Павлодар облысының әкімі өңірдегі балалармен болған зорлық-зомбылық оқиғаларына түсініктеме берді

Павлодар облысының әкімі Асаин Байханов 2024 жылғы 25 қарашада ОКҚ-да өткен баспасөз мәслихатында балаларға қатысты зорлық-зомбылық жағдайларын анықтауға және кәмелетке толмағандар зорлық-зомбылық туралы айтудан қорықпайтын жағдай туғызу қажеттігін мәлімдеді, деп хабарлайды Zakon.kz.

Сонымен қатар, өңір басшысы атап өткендей, мектептердегі барлық мұғалімдер мінез-құлқының өзгеруін бақылау тұрғысынан балаларға назар аударуы керек.

"Өткен жылы мұндай жағдайлардың саны 30-ға жетті. Биыл да 30. 30-ның 25-і үйде болды, онда балалар барынша қауіпсіз және сүйіспеншілік пен қамқорлықты сезінуі керек. Бес жағдай - үйден тыс жерде, бұл қонақ үйлер, саябақтар, алаңдар да болған. Мемлекеттік мекемелерде зорлық-зомбылық болған жоқ", — деді Асаин Байханов.

Ол 30 жағдайдың 16-сы мемлекеттік органдармен психологтар мен педагогтардың көмегімен ашылғанын, 14-і ата-анасының өтінішінен кейін тергелгенін атап өтті.

"Бұл жағдайлардың барлығы мұқият тергеуді қажет етеді. Әр оқиға менің бақылауымда", — деді Асаин Байханов.

Әкім соңғы жағдайлар отбасылық құндылықтар жүйесіне қатты әсер еткенін атап өтті.

"Мен төрт баланың әкесі ретінде апта сайын осындай жаңалықты алған кезде, әрине, өзгелер тәрізді қапа боламын. Сондықтан, мұндай жайттармен тыңғылықты күрес қажет. Бұл жалғыз мемлекеттік органдардың қолынан келмейді, ата-аналардың да көмегі керек",- деді Асаин Байханов.

Ол сондай-ақ үш бөлмелі пәтерде болған зорлық-зомбылық жайлы және сол сәтте көрші бөлмеде баланың басқа туыстары болған оқиғаға пікір білдірді. Айта кетейік, бұл қылмыс түнде емес, күндіз жасалған.

"Мен аймақ басшысы ретінде жауапкершілікті өзімнен алып тастамаймын. Мен өңірде болып жатқан барлық нәрсеге, соның ішінде үйде болса да, толықтай жауап беремін. Бұл менің жауапкершілігім, сондықтан мен, әсіресе балаларға қатысты осындай жағдайларды өзім мұқият шешемін", — деп қорытындылады Асаин Байханов.

Бұған дейін Петропавлда "синтетика" таратқан күдіктілер ұсталғаны хабарланған болатын.