Жамбыл облысының 14 ауылы Таразға қосылады

Жамбыл облысындағы 14 ауыл Тараз қаласының құрамына қосылады. Олардың барлығы Жамбыл және Байзақ ауданына қарасты елдімекендер.

Осылайша облыс орталығының аумағы 13 мың гектарға ұлғаяды. Ал 47 мыңға жуық тұрғын тараздық атанып, қала халқы 480 мыңға жетпек.

Атап айтқанда Жамбыл ауданынан Шайқорық, Ақбұлым, Бектөбе, Қызылшарық, Жалпақтөбе, Түрксіб, Сұлутөр және Қоңыртөбе ауылы бар, деп жазады qazaqstan.tv.

Ал Байзақ ауданынан Қызыл жұлдыз және Талас ауылы қалаға қосылады. Жоспар жаңа жылдан кейін жүзеге асады.

Оған дейін ауылдардың әлеуметтік мәселесін шешу бойынша арнайы "Жол картасы" әзірленбек. Кейін Тараз қаласы екі әкімшілік ауданға бөлінеді.