ШҚО-да полицейлер қар құрсауында қалған 300-ден астам жүргізушіге көмектесті

Қыс басталғалы бері Шығыс Қазақстан облысының патрульдік полиция батальоны ерекше кәсіби шеберлік танытып, қар құрсауында қалған 300-ден астам жүргізушіге көмек көрсетті.

Қатты қар жаууы мен ауа райының күрт нашарлауына байланысты жүргізушілер жолдағы сапарларын жалғастыра алмай, техникалық ақауларға тап болып немесе қарға батып қалған, жағдайлар көп кездескен.

Батальон әрбір шақыртуға мұқият қарап, жедел әрекет ету арқылы жүргізушілер мен олардың жолаушыларының қауіпсіздігін қамтамасыз етті.

Сонымен қатар полицейлер қысқы қиын ауа райы жағдайында тасжолдарда бөгеліп қалған шамамен мыңға жуық көлікті алып жүрген.

Өздерінің кәсіби дағдылары мен техникалық құралдарын қолдана отырып, олар қозғалыс қауіпсіздігін қамтамасыз етіп, жол-көлік оқиғалары мен басқа да төтенше жағдайлардың алдын алып үлгерді.

Тәртіп сақшыларының біріккен күш-жігерінің арқасында көптеген жүргізушілер күрделі жол учаскелерінен сәтті өтіп, көздеген орындарына артық қиындықсыз жетті.

Ерекше атап өтетіні, жедел арнаға көмек пен батальон қызметкерлерінің кәсібилігі үшін алғыс білдірген 10-ға жуық қоңырау түскен. Олар күн сайын өз өмірлерін қатерге тігіп, аязды, қарлы және боранды күндерде қызмет атқарып, жол қауіпсіздігін қамтамасыз етіп, адамдардың өмірін сақтап қалуда.

Қазіргі уақытта да олар жүргізушілерге үздіксіз көмек көрсетіп, қолайсыз ауа райы жағдайында тәртіпті қамтамасыз етуді жалғастыруда.