Костенко шахтасындағы апат: Денсаулық сақтау министрлігі Қарағандыға бір топ дәрігерді аттандырды

Денсаулық сақтау министрлігі зардап шеккендерге консультациялық көмек көрсету үшін құрамында токсиколог, травматолог-ортопед және нейрохирург бар жоғары дәрежелі дәрігерлер тобын Қарағандыға жібереді, деп хабарлайды Zakon.kz.

Бұл жөнінде ведомствоның баспасөз қызметі мәлімдеді.

"Зардап шеккен кеншілердің өмірі мен денсаулығын сақтау үшін саланың үздік мамандарын тарта отырып, барлық қажетті медициналық көмек көрсетіледі".ҚР Денсаулық сақтау министрлігінің баспасөз қызметі

Қазіргі уақытта 18 адам профессор Х. Ж. Мақажанов атындағы көпбейінді ауруханаға жеткізілді, оның 17-сі стационарлық емдеуге жатқызылды, 1 зардап шегуші амбулаториялық емделуде.

Бұған қоса ведомствоның баспасөз қызметі ауруханаға түскендердің жағдайынан хабардар етті.

"Жеңіл және орташа ауырлықтағы улы газдармен уланудан зардап шеккен 15 адам аурухананың токсикология бөлімшесінде емделуде. Бір адам политравмамен реанимация және қарқынды терапия бөлімшесінде, жағдайы ауыр, тұрақты, есінде".ҚР Денсаулық сақтау министрлігі

Министрлік өкілдерінің мәліметінше, жағдайы орташа ауырлықтағы тағы бір зардап шегуші травматология бөлімшесінде медициналық көмек алады.

Қарағанды ​​облысындағы Костенко атындағы шахтада 28 қазан күні сағат 02:33-те жарылыс болды.

"АрселорМиттал Теміртау" АҚ 12:00-дегі жағдай бойынша, Костенко шахтасындағы апат салдарынан 21 адам қаза тапқанын хабарлады.