Нутрициолог күнделікті тұтыну керек үш тағамды атады

Нутрициолог Ақнұр Қозыбаева адам ағзасына күнделікті тұтыну керек үш тағамды атады, деп хабарлайды Zakon.kz

Ең бірінші адам ағзасы 90 пайыз судан тұрғандықтан, күніне кемі 2,5 литр су ішу керек. Су ішу арқылы ағзадағы жасушалар жаңартылады. Бірақ тазартылған су ішу керек. Краннан су ішуге мүлде болмайды, себебі оның құрамында ағзамызға зиянды бактериялар, ауыр металдар, токсиндер көп. Сүзгіден өткен суға аздан зімбір, бал қосып ішсе болады.Ақнұр Қозыбаева

Нутрициолог екінші кезекте тағамдар арқылы минералды тұздарды пайдалану қажеттігін айтты.

Екіншіден, біздің ағзамызға минералды тұздар керек. Олар аскөк, ақжелкенде, шпинат, сельдерей, қияр сынды жасыл өсімдік атаулыда болады. Оларды тамақ ішпес бұрын 100-150 г жеп алса, ас сіңімді болады. Ақнұр Қозыбаева

Нутрициологтың айтуынша, үшінші кезекте адам ағзасына глюкоза қажет. Оны жеміс-жидектерден алуға болады.

Үшінші – глюкоза. Мұны міндетті түрде күнделікті тұтынуымыз қажет. Глюкозаны көбіне жеміс-жидектерден аламыз. Құрма, қара өрік, банан, жүзім, жүгерінің құрамында көбірек болады. Сондай-ақ бал, кептірілген жемістер, мейіз, смузида да глюкоза бар.Ақнұр Қозыбаева

Сонымен қатар, маман аталған тағамдарды таңертең тұтынған дұрыс деп есептейді. Себебі таңертең біз ағзамызға күш беретін, қажетті тағамдарды жеуіміз керек. Бастысы суды ұмытпау керек екенін ескертті.