Қапшағайдағы туристер дәретхана жоқтығына шағымданып жатыр

Қапшағай су қоймасында демалушылар қоғамдық дәретханалардың аздығына шағымданды. Әкімдік алдағы туристер көп келетін маусымда мәселені шешуге уәде беріп отыр, деп хабарлайды Zakon.kz.

Туристердің айтуынша, жағалауда дәретханалар іс жүзінде жоқ. Бұл жалпы қалалық жағажайға ғана емес, сонымен қатар коммерциялық нысандардың аумағына да қатысты.

"Қапшағайда 4 күн болдық. Ең сорақысы - демалыс күндері ондаған мың турист келді. Дәретхана табу өте қиын болды. Тапқан күнде де толған кезек және іші лас. Дәретханалардың көбірек болғанын қалар едім. Бұл деген біріншіден, гигиена емес пе?"Алматылық турист Асылбек Сәндібеков

Қонаев қаласы әкімдігінің мәліметінше, жағалауда 8 әжетхана бар. Оның екеуі тегін, ал қалғандары ақылы. Бір кіруге - 150 теңге. Дегенмен туристер ағылған кезде ол бәріне бірдей жетпейді, тым аз.

"Биыл ол жерге қоғамдық дәретханалар орнатуды жоспарлаған едік. Бірақ Алматы облысы бөлінуіне байланысты жоба тоқтатылды. Енді жағажайдың 5,2 шақырымында келесі жылы жаңа нысандардың құрылысын бастаймыз. Қоғамдық дәретханалар орнатамыз".Қалалық тұрғын үй-коммуналдық шаруашылық бөлімі басшысының орынбасары Асхат Жексембеков

Шенеунік жағажайды қайта жөндегеннен кейін Қапшағай көлінің жағасында амфитеатр, душ, көру алаңдары, веложолдар, пирс және бейнебақылау камералары пайда болатынын айтты.

17 шілде күні Конев-Алматы тас жолында, су қоймасының жағалауында демалушылар көп келуіне байланысты кептеліс пайда болды. Әлеуметтік желіде бұл туралы видеолар тарады. Ал туристер көп болғандықтан қаланың коммуналдық қызметі күніне 15 тоннаға дейін қоқыс шығаруға мәжбүр.