Жетісу облысында шенеунік есепшіден 380 млн теңге пара талап еткен

Жетісу облысы білім бөлімінің бұрынғы басшысы өз қызметкерінен жылы қабақ танытып, қамқорлық жасағаны үшін 380 млн теңге талап еткен, деп хабарлайды Zakon.kz.

Жетісу облысының мамандандырылған ауданаралық қылмыстық соты 17 шілдеде аса ірі мөлшерде пара алуға оқталған айыпталушыға қатысты қылмыстық істі қарады (ҚР ҚК-нің 24-бабы, 3-бөлігі, 366-бабының 4-бөлігі). 

Сотпен анықталғаны:

• Бұрынғы білім бөлімінің бастығы бухгалтер мен оның екі сыбайласының ірі мөлшерде бюджет қаражатын жымқырғанын анықтаған (оларға қатысты жымқыру фактісі бойынша жеке қылмыстық іс жүргізілуде).
• Өзінің қызметтік жағдайын пайдалана отырып, ол бухгалтерден атқарып отырған лауазымын босатуды немесе қамқорлығы үшін 380 млн теңге пара беруді талап еткен. Бухгалтер мен оның сыбайластары 200 миллион теңге жинап, оны көлік жүргізушісі арқылы бөлім бастығына берген.
• Кейінірек, басшы параның қалған сомасын талап еткенде, бухгалтер құқық қорғау органдарына жүгініп, басшы 80 миллион теңге пара алған кезде ұсталған.
• Сотталушының кінәсі куәгерлердің айғақтарымен, сот сараптамаларының қорытындыларымен, қылмыстық іс материалдарымен және іс бойынша жиналған басқа да дәлелдемелермен расталады.

Сот неге және қандай жаза тағайындады

• Сот жаза тағайындау кезінде қылмыстық жауаптылық пен жазаны жеңілдететін мән-жайды асырауында жас балалардың болуын ескерді. Ауырлататын мән-жай – мемлекеттік қызметшінің антын бұзу.
• ҚР ҚК-ның 366-бабының 4-бөлігінің санкциясы параның 70 еселенген сомасынан 80 еселенген сомасына дейін немесе 10 жылдан 15 жылға дейін бас бостандығынан айыру түріндегі жазаны көздейді.
• ҚР ҚК-ның 56-бабының 3-бөлігіне сәйкес қылмысқа оқталғаны үшін жазаның мерзімі немесе мөлшері жазаның негізгі түрінің ең жоғары мерзімінің немесе мөлшерінің ¾ бөлігінен аспауға тиіс.
• Сотталушы ҚР ҚК-ның 366-бабының 4-бөлігі және 24-бабының 3-бөлігі бойынша кінәлі деп танылды. Ол 11 жылға бас бостандығынан айырылды.

Сот үкімі заңды күшіне енген жоқ.