Бөген су қоймасының жарылып кету қаупі туралы ақпаратқа билік жауап берді
Сурет: gov.kz
Қазақстан Республикасы Су ресурстары және ирригация министрлігінің берген жауабына сай, Бөген су қоймасы Түркістан облысы әкімдігінің қарамағында.
"Әкімдіктің жөндеу жұмыстары туралы ақпараты бойынша, су қоймасына төтенше жағдайдың алдын алу үшін көп факторлы тексеру жүргізілді. Қазіргі уақытта күрделі жөндеудің жобалау-сметалық құжаттамасы әзірленіп жатыр. Мемлекеттік сараптама қорытындысы осы жылдың маусым айында дайын болады деп күтілуде." Қазақстан Республикасы Су ресурстары және ирригация министрлігі
2022 жылы су қоймасына ағымдағы жөндеу жұмыстары жүргізілді, оның барысында 2000 текше метр қойтас төселді. Нысан апатты жағдайлардың алдын алу үшін қажетті ресурстармен қамтамасыз етілген, оның ішінде 700 текше метр қойтас, 50 текше метр құм, 100 текше метр қиыршық тас, 10 тонна цемент және 1000 қап бар.
"Арал-Сырдария" бассейндік инспекциясының мамандары визуалды тексеріс жүргізіп, акт жасады. Қазақстан Республикасы Су ресурстары және ирригация министрлігі
Бұдан бөлек, бассейндік инспекция Қазақстан Республикасы Су ресурстары және ирригация министрлігінің Су шаруашылығы комитеті бекітуі үшін Бөген су қоймасының су ресурстарын пайдалану тәртібін келісу қажеттігі туралы әкімдікке хат жолдады.
Ал облыс әкімдігі бүгінде Бөген су қоймасында төтенше жағдай қаупі жоқ деп сендірді.
"Бүгінгі таңда "Бөген" су қоймасында төтенше жағдайдың орын алу қауіпі төніп тұрған жоқ. 2021-2022 жылдары төтенше жағдайлардың алдын алу мақсатында ағымдағы жөндеу жұмыстары жүргізілді. Қазіргі уақытта күрделі жөндеу жүргізуге жобалық-сметалық құжаттама әзірленуде. Жобаға мемлекеттік сараптамасының қорытындысын ағымдағы жылдың маусым айында алу жоспарлануда." Түркістан облысының әкімдігі
Сонымен қатар су қойманың беріктігін арттыру мақсатында 2022 жылы ағымдағы жөндеу жұмыстары жүргізілді. Қазіргі уақытта қоймадағы су авариялық жағдайлардың алдын алу бойынша тиісті құралдармен қамтамасыз етілген.
"Су қойманың пайдалу ережесі 1967 жылы "Союзгипрорис" институтының жобасы бойынша әзірленіп, пайдалануға берілген. 2017 жылы "Қазсушаржоба" РМК ОҚФ "Оңтүстіксушаржоба" ӨБ арқылы жаңартылды." Түркістан облысының әкімдігі
Қазіргі уақытта Бөген су қоймасының пайдалану режимі әзірленіп, Арал-Сырдария бассейндік инспекциясына келісуге жіберілді.
"10 наурыздағы жағдай бойынша Бөген су қоймасында 349,1 млн.м3 су жиналып, өткен жылмен салыстырғанда 14 млн.м3-қа (2023 ж. 363,1 млн.м3) кем. Қазіргі таңда, су қоймаға 45,6 м3/сек су келіп, 15 м3/сек су босатылуда." Түркістан облысының әкімдігі
Бекітілген кестеге сәйкес, жыл сайын наурыз айынан бастап шаруаларға көктемгі егіс жұмыстарына ағын су жеткізіледі.
"Түркістан облысы, Ордабасы ауданындағы сыйымдылығы 370 млн.м3 құрайтын "Бөген" су қоймасы 1967 жылы пайдалануға берілген. Жалпы суармалы жер көлемі 67 мың гектар. Құйылмалы және ескі арналы сулар мен "Бөген" және "Арыс" өзендерінен толтырылады. Тек ресми дереккөздерге сенуді сұраймыз және жалған ақпарат таратудан аулақ болуға шақырамыз." Түркістан облысының әкімдігі
