Тоқаев Шольцтің өтініші бойынша Украина төңірегіндегі жағдайды реттеу туралы пікірін айтты

Президент кездесу өткізді, сурет - Zakon.kz жаңалық 16.09.2024 15:26

Сурет: akorda.kz

Кездесуде Олаф Шольцтің өтінішімен Қасым-Жомарт Тоқаев Украина төңірегіндегі жағдайды реттеуге байланысты пікірін жеткізді, деп хабарлайды Zakon.kz.

Қазақстан президенті Қасым-Жомарт Тоқаевтың пікірінше әскери тұрғыда Ресейдің жеңілмейтіні анық.

"Соғыс бұдан әрі өрши берсе, барша адамзатқа, ең алдымен, Ресей-Украина қақтығысына тікелей қатысы бар мемлекеттерге салдары өте ауыр тиеді. Өкінішке қарай, Ыстанбұл келісімін бекітуден бас тартып, татуласуға қол жеткізетін оңтайлы мүмкіндікті уыстан шығарып алды." Қасым-Жомарт Тоқаев

Дегенмен бейбітшілік орнатуға әлі де мүмкіндік бар, — дейді президент.

"Түрлі мемлекеттердің барлық бейбіт бастамаларын мұқият қарап, әскери іс-қимылдарды тоқтату туралы келісімге келу керек. Содан кейін территориялық мәселелерді талқылаған жөн. Біздіңше, Қытай мен Бразилияның бейбітшілік жоспары қолдауға тұрарлық. Мемлекеттер басшылары келеді, кетеді. Ал халық, әсіресе көршілес халықтар бейбіт әрі бір-бірімен түсінісіп өмір сүруі керек. Қазақстанның Ресеймен дүние жүзі бойынша құрлықтағы ең ұзын шегенделген шекарасы бар. Біздің елдеріміз арасындағы ынтымақтастық стратегиялық серіктестік пен одақтастық аясында дамып келеді. Қазақстандықтар украин халқы мен оның төл мәдениетіне шынайы құрметпен қарайды. Қазақстан мен Украина арасында ешқандай келіспеушілік болған емес. Киевте Елшілігіміз әлі де жұмыс істеп жатыр", – деді Мемлекет басшысы.

Бұдан бұрын хабарланғандай, Қасым-Жомарт Тоқаев Ақорда резиденциясында Германия Федералдық канцлері Олаф Шольцпен кездесті.

Оқи отырыңыз