Ынтымақтастықтың жаңа мүмкіндіктері: Қазақстан мен Ресей арасындағы келісімдер жайында сарапшы пікірі

Владимир Путиннің Қазақстанға мемлекеттік сапары ұзақ жылдар бойы табысты дамып келе жатқан екіжақты ынтымақтастық негізінің заңды жалғасы болып табылады. Айта кетейік, Ресей Президентінің Қазақстанға осындай сапары 9 жыл бұрын – 2015 жылы болған, деп хабарлайды Zakon.kz.

Қазақстан-Ресей ынтымақтастығының негізі – мүдделердің ортақтығы, өзара құрмет және жоғары деңгейдегі сындарлы саяси диалог. Бұл қағидаттар кез келген заманауи мемлекетаралық қатынастардың негізгі элементтері болып табылады, дейді Қазақстан Республикасының Президенті жанындағы Қазақстанның стратегиялық зерттеулер институты Еуропа және Американы зерттеу бөлімінің жетекші сарапшысы Әлішер Әбдірешев.

Мемлекет басшыларының егжей-тегжейлі саяси мәлімдемесін дайындауы және ондаған келісімдерге қол қоюы екі жақтың одақтастық байланыстарды нығайтуға және экономика, саясат және мәдени-білім алмасу салаларындағы ынтымақтастықты одан әрі тереңдетуге бейілділігін атап көрсетеді.

Бүгінгі таңда Қазақстан мен Ресей түрлі жұмыс істейтін мемлекетаралық платформалардың табыстылығымен және тұрақтылығымен мақтана алады. Мәселен, биыл 20 жылдығын атап өтетін Өңіраралық ынтымақтастық форумына екі елдің өкілдері жылдан-жылға бас қосып келеді.Бұл форматты сауда-экономикалық өзара іс-қимылдың өзекті мәселелерін шешу және талқылау тұрғысынан ең тиімді деп сенімді түрде сипаттауға болады, деп атап өтті ҚСЗИ қызметкері.

Сонымен қатар, екі елдің өкілдері үкіметаралық комиссиялар, Сыртқы істер министрліктеріаралық консультациялар, бірлескен демаркациялық комиссиялар және т.б. шеңберінде тұрақты түрде кездесулер өткізеді. Мұның барлығы Қазақстан-Ресей диалогының практикалық құрамдас бөлікке толы екендігінің көрсеткіші. Бүгінде екі мемлекеттің өкілдері ынтымақтаспайтын саланы атау қиын.

Астана мен Мәскеу ынтымақтастығының тағы бір маңызды аспектісі – БҰҰ, ЕАЭО, ТМД, ҰҚШҰ, ШЫҰ, АӨСШК сияқты халықаралық беделді институттар аясындағы өкілдік пен байланыс.

"Осы ұйымдарға бірлесіп қатысу Қазақстан мен Ресейге кең ауқымды мәселелер бойынша іс-қимылдарды тиімді үйлестіруге, екіжақты қарым-қатынастарды нығайтуға және тұтастай алғанда халықаралық саясаттың өзекті мәселелеріне "сауатты үндестіруге" мүмкіндік береді". Әлішер Әбдірешев

Жалпы, бұл сапар мен қол қойылған келісімдер экономикалық ынтымақтастықтың жаңа мүмкіндіктерін ашады. Сауда-экономикалық өзара іс-қимылдың әсерлі көлеміне қарамастан, екі елдің бір-біріне ұсынатын нәрселері әлі де бар.

Осы тұрғыда мемлекетаралық диалогтың қозғаушы күші болып қала отырып, жұмыс істеп тұрған мемлекетаралық платформалардың әлеуетін одан әрі жетілдіру және нығайту қажет, деп атап өтті Әлішер Әбдірешев.

Жоғары деңгейдегі келіссөздер барысында стратегиялық қарым-қатынастардағы ынтымақтастықты тереңдету және өзара тауар айналымын одан әрі арттыру басты міндеттер ретінде атап өтілгенін бұған дейін хабарлаған болатынбыз. Экономикалық ынтымақтастықтың 2021-2025 жылдарға арналған кешенді бағдарламасы, 2024-2026 жылдарға арналған бірлескен іс-шаралар жоспарын қамтитын үкіметаралық құжаттар пакеті қабылданды.

Айта кетейік, 2024 жылғы 27 қарашада "Известия" газетінде Қазақстан Президентінің мақаласы, ал Ресей Президентінің мақаласы "Казахстанская правда" беттерінде жарияланған.