ІІМ нашақорлықты анықтау үшін скрининг өткізу жүйесін енгізуді жоспарлап отыр

Сурет: Астана қаласы ПД

Ішкі істер министрлігі есірткіге тәуелді адамдарды емдеу және оңалту, сонымен бірге профилактиканың тиімді жүйесін қалыптастыруға алаңдаулы. Министрдің сөзінше, бүгінде нашақорлардың нақты және сенімді cаны жоқ, деп хабарлайды Zakon.kz.

Сарапшылардың пікірінше, нашақорлардың нақты саны ресми деректерден кемінде 5 есе көп. Мысалы, Денсаулық сақтау министрлігінің есебінде 18 мың нашақор бар.

"Сондықтан толыққанды есепті қалыптастыру үшін мәліметтерді түрлі дерекөзден алу қажет. Қазір өкінішке қарай, есірткі қолдану фактілері тіпті оқушылардан анықталып жатыр. Сондықтан болашақта скрининг өткізу жүйесін енгізуді жоспарлап отырмыз. Бұл қоғамның нашақорлық деңгейін объективті түрде бағалауға және есірткіге тәуелді адамды, әсіресе жасөспірімдер арасында ерте бастан анықтауға мүмкіндік береді", - деді Ішкі істер министрі Марат Ахметжанов.

Сонымен қатар Марат Ахметжанов наркологиялық көмек пен қайта оңалту сапасын арттыру қажет екенін айтты. Ол үшін наркологиялық диспансерлерді жаңғырту және жөндеу, емдеу-еңбек шеберханаларын құру көзделіп отыр.

Оқи отырыңыз