Батыс Қазақстан облысында 5 үйден су толығымен сорылды

тасқын, сурет - Zakon.kz жаңалық 14.03.2023 23:27

Сурет: Төтенше жағдайлар министрлігінің баспасөз қызметі

Батыс Қазақстан облысында су тасқынына қарсы белсенді іс-шаралар жалғасуда. Тартылған құрылымдардың жедел жұмысының арқасында су басқан 5 үйден су толығымен сорылды, бұл Сырым ауданының эвакуацияланған 26 тұрғынына өз үйлеріне оралуына мүмкіндік берді, деп хабарлайды Zakon.kz.

Тек өткен тәуліктің ішінде қауіпті учаскелерде 3 мыңға жуық дана қапқа инертті материалдар салынып төселді, 30 мың текше метрден астам су сорылды, 11 учаскеде су бұру үшін траншея қазылды.

Дерқұл және Шаған өзендерінің жай-күйін бағалау мақсатында ЖАО, ТЖД, Қазгидромет, Қазсушар өкілдерімен бірігіп "Орал қаласы-Бәйтерек ауданы" бағыты бойынша әуеден барлау жүргізілді.

Авариялық-құтқару және шұғыл жұмыстарды жүргізуге Атырау және Маңғыстау облыстарынан қосымша тартылған ТЖМ күштері мен құралдарын қоса алғанда, ТЖМ, жергілікті атқарушы органдардың, ІІМ, ҚМ күштері мен құралдары жұмылдырылып жатыр.

Сурет: Төтенше жағдайлар министрлігінің баспасөз қызметі

Қалған эвакуацияланған 28 адам уақытша эвакуациялау пункттеріне, 205 адам туыстарының үйлеріне орналастырылды. 280-ден астам ауыл шаруашылығы жануарлары қауіпсіз жерлерге айдалды.

40 үй су астында қалып отыр. Су тасқынына қарсы іс-шаралар жалғасып жатыр.

Оқи отырыңыз