"Суретін көрсетіп, бопсалаған". Түркістан облысында оқушы қызды өлтіргендерге қатысты сот үкімі шықты
Сурет: Zakon.kz
Іс өңірдің мамандандырылған ауданаралық сотында ашық жағдайда қаралды. Сотталушыларға мемлекеттік айыптаушы бірден бірнеше бап бойынша айып тақты:" Кәмелетке толмағанды қылмыстық құқық бұзушылыққа тарту", "Бопсалау" және "Кісі өлтіру". Сотталушылар өз кінәсін ішінара мойындап, өздеріне бас бостандығынан айыру түрінде жаза тағайындамауды сұрады. Судьяның үкіміне сәйкес, сотталушылардың бірі 16 жылын колонияда өткізеді. Біле тұра болған қылмыс жайлы хабарламағаны үшін кінәлі деп танылған екіншісіне бостандықты шектеу туралы жаза тағайындалды.
"Сот үкіміне сәйкес, сотталушы Б. ҚР Қылмыстық кодексінің "Бопсалау" және "Кісі өлтіру" бабында көзделген қылмыстарды жасағаны үшін кінәлі деп танылып, қылмыстық-атқару жүйесінің орташа қауіпсіздік мекемесінде жазасын өтей отырып, 16 жылға бас бостандығынан айыру түріндегі жаза тағайындалды. Сотталушы Т. ҚР ҚК-нің 434-бабында көзделген қылмысты жасағаны үшін кінәлі деп танылып, 1 жыл 4 ай мерзімге бас бостандығын шектеу түріндегі шартты жаза тағайындалды", - деді Zakon.kz-ға Түркістан облыстық сотының баспасөз хатшысы Әсет Серікбай.
Іс материалдары бойынша, 2023 жылдың сәуір айында сотталушы Б.Telegram әлеуметтік желісі арқылы өзінің танысы, сотталушының сыбайласы Т-дан мектеп оқушысының интимдік суреттеріне қол жеткізеді. Осыдан кейін Б. Т-мен кездесіп, оған Аружаннан 1 млн теңге бопсалауды ұсынады. Сотталушы Т. бұл ұсыныстан басын ала қашады. Сол кезде Б. егер келіспесең бұл суретті өзіне қарсы қолданамын деп қорқытады. Ақырында, бопсаласушылар Аружанмен кездескен кезде арада жанжал туындап, оның соңы кісі өлімімен тынған. Тергеу мәліметтері бойынша, марқұмның кеуде тұсына екі рет пышақ сілтелген, одан кейін оның денесін су арнасына тастаған.
"Сотталушылар алдын ала сөз байласа отырып, 08.04.2023 жылы сағат 23:00 шамасында жанында "Тас-Арық" өзені ағып жатқан А-ның үйінің маңында жәбірленушімен кездеседі. Б. жәбірленушіден бір миллион теңге көлемінде ақша сұрап, оның интимдік фотосуреттерін желіде жариялаймын деп қорқытады. Алайда жәбірленуші өзінде мұндай ақша жоқ екенін әрі бұл туралы туыстарына, сондай-ақ құқық қорғау органдарына арыз жазуға ниетті екенін айтады. Осыдан кейін сотталушылар жәбірленуші бопсалау түріндегі қылмысын жасыру мақсатында А-ның аузына киімді тықпалап жауып, сол жақ кеуде тұсына пышақпен екі рет соққы жасайды, осылайша сотталушылар қасақана кісі өлтіріп, оның денесін жақын маңдағы өзенге тастайды", – деді Серікбай.
Аружанды сыныптастары қарапайым әрі әдепті қыз деп біледі. Болжам бойынша, оны өлтірді деген бала туралы да оң пікірде. Сонымен қатар, 11-сынып оқушысын жуас, тіпті қорқақ деп сипаттайды. Марқұмның туыстары өз кезегінде сотталушылардың екеуі де ауқатты отбасыдан шыққанын айтады. Ал суреттің өзі фотошоп деседі.
Сот үкімі әлі заңды күшіне енген жоқ.
