Ерлан Қошанов парламент мәжілісінің төрағасы болып сайланды

Мәжіліс спикері болып Ерлан Қошанов сайланды, сурет - Zakon.kz жаңалық 29.03.2023 12:44

Сурет: parlam.kz

Мәжіліс депутаттары палата спикерін сайлады, деп хабарлайды Zakon.kz.

Мәжіліс төрағалығына Ерлан Қошановтың кандидатурасын депутат Бақтықожа Ізмұхаметов ұсынды.

Мәжіліс спикері жасырын дауыс беру арқылы сайланды. Ол үшін депутаттар арасынан Санақ комиссиясы құрылды. Санақ комиссиясы дауыс беру барысын және дауыстарды санауды қадағалады.

Санақ комиссиясы жасырын дауыс беру нәтижесін жариялады. 96 депутат дауысын Ерлан Қошановқа берді.

"Парламент мәжілісінің Төрағасы болып депутат Қошанов Ерлан Жақанұлы сайланды".

Ерлан Қошанов 1962 жылы Қарағанды облысында туған. 1984 жылы Қарағанды политехникалық институтын, 1999 жылы Қазақ мемлекеттік басқару академиясын бітірген. Институтты бітіргеннен кейін Жезқазған кен-металлургия комбинаты байыту фабрикасының слесары, шебері болып жұмыс істеген.

1988-1990 жылдары – Қазақстан ЛКЖО Жезқазған облыстық комитетінің жұмысшы және ауыл жастары бөлімінің нұсқаушысы, жастардың әлеуметтік-экономикалық проблемалары бөлімінің меңгерушісі.
1990-1995 жылдары – Жезқазған облыстық сыртқы экономикалық байланыстар комитетінің жетекші маманы, бөлім бастығы, төраға орынбасары, төрағасы.
1995-1999 жылдары – Қазақстан Республикасы Парламенті Сенатының депутаты.
1999-2001 жылдары – Үкіметтің Қазақстан Республикасының Парламентіндегі өкілі.
2001-2003 жылдары – Қазақстан Республикасы Премьер-Министрі Кеңсесі Басшысының орынбасары – Үкіметтің Қазақстан Республикасының Парламентіндегі өкілі.
2003-2006 жылдары – Қазақстан Республикасының Көлік және коммуникация вице-министрі.
2006-2007 жылдары – Қазақстан Республикасы Көлік және коммуникация министрлігі Азаматтық авиация комитетінің төрағасы.
2007-2012 жылдары – ҚР Премьер-Министрі Кеңсесі Басшысының орынбасары – Үкіметтің Қазақстан Республикасының Парламентіндегі өкілі.
2012-2017 жылдары – ҚР Премьер-Министрі Кеңсесінің Басшысы.
2017-2019 жылдары – Қарағанды облысының әкімі.
2019-2022 жылдары – ҚР Президенті Әкімшілігінің Басшысы.
2022 жылғы 1 ақпанда ҚР Парламенті Мәжілісінің Төрағасы болып сайланды.
«AMANAT» партиясының ҚР Парламентінің Мәжілісіндегі Фракция жетекшісі.
2022 жылғы 26 сәуірде «AMANAT» партиясының төрағасы болып сайланды.