Риддер ЖЭО-ны неліктен коммуналдық меншікке ала алмай отырғанын Ахметов айтты

Сурет: Instagram/danial.akhmetov.officia

19 сәуір күнгі үкімет отырысында Шығыс Қазақстан облысының әкімі Даниал Ахметов заңнаманың тиімсіздігінен билік Риддер жылу электр орталығын ұлттық деп атап, электр стансасын жөндей алмайтынын айтты, деп хабарлайды Zakon.kz.

Аймақ басшысының айтуынша, наурыз айынан бастап Риддер ЖЭО иелері мазут, көмір жеткізуді, жұмысшылар мен жөндеу қызметкерлерінің жалақысын төлеуді тоқтатқан.

"Сондықтан наурыз айынан бастап тиісті шараларды қолға алдық. Бұл станцияны көмірмен, мазутпен және басқа да құрамдас бөліктермен қамтамасыз етеміз. Күн сайын станция басшылығы, немесе орынбасарлары, бөлім бастығы, кей жағдайда менің өзім де бірқатар жұмысты істеуімізге тура келеді. Станцияны бүгінде оның техникалық жағдайына мүмкіндік беретін деңгейде ұстауға біздің жедел әрекетіміз керек".Даниал Ахметов

Сонымен бірге ол биліктің әлі де бүгінде қолданылып жүрген тиімсіз заңдардың тұтқынында екенін атап өтті.

"Біз не істеу керек екенін, қалай істеу керек екенін білеміз. Бірақ бұл нысанды коммуналдық меншікке қайтара алмай отырмыз. Жөндеуге кемінде төрт ай керек. Өйткені алты қазандықтың барлығы да апатты жағдайда тұр. 4 қазандықтың жағдайы тіпті қиын, олар 1956-1958 жылдары салынған. Сондықтан президенттің, үкіметтің, парламенттің тапсырмасына сай энергетикалық нысандарды мемлекет меншігіне алу туралы заң әзірлеу керек. Бұл өте аз уақытта жүзеге асады деп сенемін".Даниал Ахметов

Облыс басшысының айтуынша, осыдан кейін биыл қыркүйек-қазан айларында стансаның тұрақты жұмысын қамтамасыз ету үшін барлық шара қабылданады. Оның айтуынша, жылу электр орталығын жөндеуге шамамен 8 миллиард теңге қажет.

12 сәуірде өткен баспасөз мәслихатында Даниал Ахметов Риддер жылу-электр орталығының жаңа иелері жөндеу, жаңғырту және 3,3 миллиард теңге қарызды өтеуге байланысты ештеңе істемейтінін айтып, шағымданды.

Оқи отырыңыз