Республикадағы бас мешітті Тұңғыш президент кеңсесі қаржыландыра ма

Бас мешіт, сурет - Zakon.kz жаңалық 20.04.2023 11:53

Сурет: Instagram/bas_meshit

Мәжілісте өткен жалпы отырыс кулуарында журналистер Қаржы министрі Ерұлан Жамаубаевтан "Бас мешітті Тұңғыш президент кеңсесі қаржыландырады" деген әңгіменің рас-өтірігін сұрады, деп хабарлайды Zakon.kz.

Журналистер Қаржы министріне "Бұған дейін Астанадағы ең үлкен мешітті Тұңғыш президент кеңсесі қаржыландыратыны хабарланған еді. Оған қазірдің өзінде қанша қаржы жұмсалды?" деп сұрақ қойды.

"Менің білуімше, бұл мешіт Астана қаласының жергілікті бюджетінен қаржыландырылады. Сондықтан мәселе соларға тиесілі. Жергілікті мешіттерді ұстауға мемлекет бюджетінен ақша бөлмейміз. Бұл мешітті Тұңғыш президент кеңсесі қаржыландырмайды", - деп жауап берді министр Ерұлан Жамаубаев.

Республикадағы бас мешіт 2022 жылдың 12 тамызында Астанада ашылды. Ол - Қазақстан мен Орталық Азиядағы сыйымдылығы бойынша ең үлкен мешіттердің бірі. Мешіт 10 гектар жер учаскесінде салынған. Жалпы ауданы 68 062 м².

Мешітке 235 мың адам сыйяды. Оның ішінде ашық алаңда шамамен 200 мың адам, нақтырақ айтқанда подиум мен сахна аймағында 30 мың адам, мешіт ауласында 170 мың адам бір мезетте құлшылық жасайды.

Оқи отырыңыз