Қазақстан мен Әзербайжан тауар айналымын бір миллиард долларға жеткізуді көздеп отыр
Сурет: primeminister.kz
Үкімет басшысы ҚР президенті Қасым-Жомарт Тоқаевтың ыстық сәлемін жеткізіп, әзербайжан халқының Жалпыұлттық көшбасшысы Гейдар Әлиевтің биыл аталып өтілетін 100 жылдық мерейтойының маңызы зор екенін айтты.
Сурет: primeminister.kz
"Тауар айналымын 1 млрд долларға жеткізу жөніндегі алдымызға қойылған міндетке сәйкес, біз Әзербайжан Үкіметімен бірлесіп, сауда-экономикалық қарым-қатынастарды кеңейту бойынша жұмыс істеп жатырмыз", — деді Әлихан Смайылов.
Өз тарапынан Ильхам Әлиев ҚР Премьер-Министрінің Әзербайжанға ресми сапары екі ел арасындағы достық қарым-қатынасты одан әрі дамытуға ықпал ететініне сенім білдірді.
Сурет: primeminister.kz
"Біздің ынтымақтастығымыздың күн тәртібі өте ауқымды, ол жылдан жылға кеңейіп келеді. Президенттер деңгейінде қабылданған келісімдердің жүзеге асырылып жатқанына қуаныштымын. Бұл екі ел арасындағы қарым-қатынастың өте жоғары деңгейде екенін көрсетеді. Сонымен қатар оларды әрі қарай дамыту үшін бізде орасан зор әлеует бар. Біз келіскен шараларды іске асыру тауар айналымының ұлғаюына ықпал етіп, энергетика, көлік және басқа салаларда бұдан да ауқымды жобаларды жүзеге асыру үшін бизнеске қосымша мүмкіндіктер жасайды", — деді Ильхам Әлиев.
Әзербайжан – Қазақстанның Оңтүстік Кавказдағы ең маңызды сауда-экономикалық серіктесі. Өткен жылдың қорытындысы бойынша екіжақты тауар айналымы 40%-ға өсіп, 460 млн доллардан асты. Биылғы 4 айдың қорытындысына сәйкес өзара сауда айналымы 185 млн доллар болып, 40%-ға артты.
21 маусым күні ҚР премьер-министрі Әлихан Смайылов Әзербайжан Республикасына ресми сапармен барды.
