Депутат: Құлақсыз туған балалардың жанайқайын құлағы бар билік неге естімейді
Сурет: unsplash
"Бүгінгі депутаттық сауалым 3000 баланың көз жасы, 6000 ата-ананың аялы алақанымен қалқалап, өшіріп алмауға ұмтылған үмітінің соңғы сәулесі деп біліңіз" деп бастады сөзін депутат.
"Қазақ "бай күйігі – сыртта, бала күйігі – іште" дейді. Қазақстандағы 3000 баланың көңіліндегі күйік микротия және атрезия патологиясы деп аталады. Қарапайым тілмен айтсам, бұл бөбектер өмірге құлақсыз келген. Қазір осындай 3000-нан астам баланың болашағына балта шабылмаса екен деген мыңдаған ата-ана шырылдап жүр". Депутат Нартай Сәрсенғалиев
Оның сөзінше, бір құлағы жоқ болып дүние есігін ашқан сәбилер Қазақстанда мүгедек боп танылмайды. Зейнетақы алмайды. Біздің елде мүгедектік алу үшін екі құлақ та болмауы керек. Микротия және атрезия патологиясының емі бар. Құлақтың ішіне ота жасап, есту каналдарын ашып, сыртына табиғи құлаққа ұқсас қалып орнатып береді. Ол АҚШ-та. Бір құлаққа жасалатын операцияның құны былтыр 99 000 доллар болған, биыл 105 200 доллар. 1 ай уақытты алатын реабилитация, барып-келу жолы, жатын орын, тамақ дегендерің аталған ақшаның сыртындағы шығын.
"Естімейтін баламның үнін естіртейін деп ата-аналар үкіметке жүгінген ғой. Мынадай ресми жауап алыпты: "Әлеуметтік медициналық сақтандыру қоры" КЕАҚ деректері бойынша микротия және атрезия патологиясы бар балалар бюджет қаражаты есебінен шетелге емделуге жіберілетін балалар санатына жатпайды және медициналық көмек сапасының мониторингі департаментінің "Мұқтаж пациенттер" тізіміне енгізілмейді". Шырылдаған ата-аналар ақырында "Қазақстан халқына" қорына барыпты. Бірақ қор да қор қылып қайтарыпты. "Бізде бұл мақсатқа ақша қарастырылмаған" деген суық, суыт жауап берген. Қазақстанда аталған дертті емдейтін маман жоқ, әйтпесе естімейтін баласының жанайқайын билікке естірте алмай жүрген ата-ана Америка асып қайтсін? Құлақсыз туған, естімейтін балапандардың жанайқайын құлағы бар билік өкілдерінің еститін кезі келді ғой?" - деп қосты депутат.
Бұл - тек ресми тіркелген 3000-нан астам баланың әке-анасының жанайқайы. Науқас ретінде тіркелмегендері тіптен көп. Сөз соңында депутат мынадай ұсыныс айтты:
- Микротия және атрезия патологиясына шалдығып, бір құлақсыз туған балаларға да мүгедектіктің берілуін қамтамассыз етуіңізді сұраймын.
- "Қазақстан халқына" қоры арқылы аталған дертті емдеу үшін балалардың АҚШ-қа баруын қамтамасыз етуіңіз қажет, тиісті қаржы бөлу керек. Шешімді жедел қабылдау шарт, себебі бұл дерт балалардың екінші сау құлағының есту қабілетін нашарлатып жатыр.
- Қазақстандық білікті дәрігерлерді микротия және атрезия патологиясын емдеудің тәсілдерін меңгеру үшін АҚШ-қа оқуға жедел жіберу керек. Дәрігерлердің өзі ықылас білдіріп отыр.
