УЕФА Конференция Лигасы: "Ақтөбе" және "Ордабасы" командаларының қарсыластары анықталды

УЕФА, сурет - Zakon.kz жаңалық 21.06.2023 19:19

Сурет: Instagram/fcaktobe_official

Швейцарияның Ньон қаласында УЕФА Конференция Лигасының екінші іріктеу кезеңінің жеребе тарту рәсімі өтті, осыдан кейін "Ақтөбе" және "Ордабасы" футбол клубтарының болашақ қарсыластары белгілі болды, деп хабарлайды Zakon.kz.

Жеребе қорытындысына сәйкес, отандық командалар аты танымал футбол ұжымдарымен бетпе-бет келетінін атап өткен жөн. Сонымен, шымкенттік "Ордабасы" поляктың "Легиясымен" кездесетін болды, деп жазады УЕФА баспасөз қызметі.

Ал "Ақтөбе" командасы "Торпедо" (Кутаиси, Грузия) – "Сараево" (Босния және Герцеговина) жұптарының жеңімпазымен алаңға шығады. Екі матчтың өту мерзімі 27 шілде мен 3 тамызға жоспарланған.

Жеребе тарту барысында Конференция Лигасы мен Чемпиондар Лигасындағы "Тобыл" мен "Астананың" болашақ қарсыластары да анықталды. Бірақ бұл үшін қостанайлықтар мен астаналықтар жоғарыда аталған турнирлердің бірінші айналымындағы қарсыластарын еңсеріп алуы қажет. Егер "Тобыл" бірінші айналымнан сәтті өте алса, онда ол Швейцарияның "Базель" командасымен ойнайтын болады.

Чемпиондар Лигасының іріктеу сынының бірінші айналымында "Астана" Тбилисидің "Динамосынан" жеңіліп қалған жағдайда, одан әрі елордалық ұжым "Хамрун Спартанс" (Мальта) – "Маккаби" (Израиль) жұбының ұтылған командасымен ойнайтын болады.

Оқи отырыңыз