ДХР және ЛХР тәуелсіздігін тану мәселесі күн тәртібінде жоқ – ҚР СІМ
Сурет: ҚР Сыртқы істер министрлігінің баспасөз қызметі
Бұл жағдайда Қазақстанның ұстанымы, егер Донецк және Луганск халық республикалары (ДХР және ЛХР) төңірегіндегі шиеленіс туралы айтатын болсақ, онда, өздеріңіз білетіндей, Ресей президенті бұл республикаларды тану туралы жарлыққа қол қойды: алдымен, біз Ресейдің мұндай шешім қабылдау себептерін талдаудан бастауымыз керек.ҚР Сыртқы істер министрі Мұхтар Тілеуберді
ҚР СІМ басшысының айтуынша:
Біріншіден, Батыс пен Ресей арасында қауіпсіздік жүйесіне қатысты келісімдер жоқ екені түсінікті. Өздеріңіз білетіндей, ресейлік тарап Ресей мен АҚШ арасындағы, сондай-ақ Ресей мен НАТО арасындағы келісімнің жобасын жіберді. Бірақ бұл мәселе бойынша келісімге келген жоқ.
Екіншіден, Нормандия форматына қатысушылар Минск келісімдерін іске асыру жолдары бойынша өзара түсіністікке келген жоқ. Бұл да себептердің бірі.
Ал үшінші себеп, әрине, Донецк және Луганск халық республикаларындағы гуманитарлық дағдарыс – босқындар легі бұл республикалардан Ресейге қарай бет алды.
Қазір Қазақстанның ресми ұстанымы әзірленуде. Алдағы бірнеше сағатта Қазақстанның қауіпсіздік кеңесі өтеді, онда біз түпкілікті позицияны қабылдаймыз. Бірақ Қазақстан Донецк және Луганск халық республикаларын тану мәселесін көтеріп жатқан жоқ. Біз халықаралық құқық негіздеріне және БҰҰ Жарғысының негізгі қағидаттарына сүйенеміз.ҚР Сыртқы істер министрі Мұхтар Тілеуберді
Бұған дейін ҚР Сыртқы істер министрлігі Украинадағы жағдай ушығып кетсе, ол жақтан Қазақстан азаматтарын эвакуациялау мәселесі қарастырылып жатқанын мәлімдеген еді.
Премьер-министрдің орынбасары «жағдай қазір шиеленісіп келе жатқанын, сондықтан Қазақстан бұл жағдайды реттеу үшін бүкіл халықаралық қауымдастықты дипломатиялық тұрғыдан күш салуға шақыратынын және соған дайын екенін» атап өтті.
22 ақпанда Ресей президенті Владимир Путин өзін-өзі тәуелсіз деп жариялаған Донецк және Луганск халық республикаларын тану туралы шешім қабылдады. Бұл туралы ол ресейліктерге сөйлеген сөзінде айтты. Ол тікелей эфирде тиісті жарлыққа қол қойды.
Сондай-ақ Владимир Путин Қорғаныс министрлігіне Ресей қарулы күштерінің ДХР мен ЛХР-да бейбітшілікті сақтауды қамтамасыз етуін тапсырды.
Украина президенті Владимир Зеленский бес минуттық мәлімдеме жасап, бұл оқиғаларға баға берді.
