Түркияда жойқын жер сілкінісінен қаза тапқан адамдар саны 40 мыңнан асты

Төтенше жағдай, сурет - Zakon.kz жаңалық 19.02.2023 11:28

Сурет: ҚР ТЖМ

Түркияда жойқын жер сілкінісі кезінде қаза тапқан саны 40 642 адамға жетті. Бұл туралы Анкарада өткен брифингте Түркия үкіметі жанындағы табиғи апаттармен және төтенше жағдайлармен күрес департаментінің (AFAD) басшысы Юнус Сезер мәлімдеді, деп хабарлайды Zakon.kz.

Оның айтуынша, апат аймағындағы іздестіру-құтқару жұмыстарын жексенбі, 19 ақпанда аяқтау жоспарланған.

"Қазіргі уақытта іздеу-құтқару жұмыстарына шамамен 13 мыңға жуық адам тартылған. Шетелден көмекке келгендерге шын жүректен алғыс айтқым келеді. 80 елден келген құтқарушылардың бір бөлігі еліне оралды", - деп Анадолы агенттігі AFAD басшысының сөзін келтіреді.

AFAD басшысы тек өзі басшылық ететін басқарма желісі арқылы апат аймағынан 430 мыңнан астам адам эвакуацияланғанын атап өтті.

Айта кетсек, бүгін түнде Газиантеп қаласындағы қазақстандық құтқарушылардың бірінші эшелоны елге аман-есен оралды. ҚР ТЖМ құтқарушылары мен Апаттар медицинасы орталығының дәрігерлері бар борт Алматы әуежайына қонды. Оларды қазақстандықтар, туыстары, достары мен әріптестері күтіп алды.

Оқи отырыңыз