Сапалы айран қандай болуы керек: соңғы зерттеулер нені көрсетті
Сурет: pixabay
Ең бастысы, айран таңдауда қателеспей, оны тұтынғанда денсаулығыңызға зиян келмеуі керек. Бұл туралы "Маңғыстау облыстық тұтынушылардың құқықтарын қорғау қоғамы" қоғамдық бірлестігі мәлім етті.
Тұтынушылардың Алматы облысында сатылатын тауарлар туралы, олардың қауіпсіздігі мен сапасы, сондай-ақ сатушылар (дайындаушылар) туралы ақпарат алу құқығын қамтамасыз ету және әлеуметтік жобаны жүзеге асыру мақсатында тұтынушылардың құқықтарын қорғау сарапшысы Жанна Биятан "Умут и Ко" ЖШС (Қырғызстан, Гидростроитель ауылы) өндірген, көлемі – 1000 грамм "Кефир нормализованный" майлылығы 2,5%, табиғи сүт өнімін Алматы облысы Қонаев қаласындағы "Супер цена" дүкенінен сатып алды.
Сурет: Жанна Биятан
Сарапшы өнімді кешенді зерттеу үшін Қазақстан Республикасы Денсаулық сақтау министрлігі Санитарлық-эпидемиологиялық бақылау комитетінің Алматы қаласындағы "Ұлттық сараптама орталығы" ШЖҚ РМК филиалының аккредиттелген зертханасына тапсырды. Орталық мамандары оны Кеден одағының 2152-2014 "Сүт және сүт өнімдері" Фальсификацияны анықтау" және "Сүт және сүт өнімдерінің қауіпсіздігі туралы" 033/2013 техникалық регламентіне сәйкестігін тексерді.
Өнімді өндіру күні – 2024 жылдың 28 қыркүйегі, ал жарамдылық мерзімі – 2024 жылдың 12 қазаны. №1240011003526201 зерттеу хаттамасына сәйкес, үлгіде кейбір қышқылдардың стандартты көрсеткіштерге сәйкессіздігі анықталды.
Мысалы, каприл қышқылының концентрациясы – 1,0-2,0, қалыпты көрсеткішінде – 2,7, ал каприл қышқылының концентрациясы – 2,0-3,5, қалыпты көрсеткіште 0,6 болып шықты, яғни, зерттеулер стандартқа сәйкес еместігін көрсетті.
Сонымен қатар, каприл қышқылының жоғарылауы өнімнің органолептикалық қасиеттеріне (яғни, дәмі немесе иісі) теріс әсер етуі мүмкін, сонымен қатар оның сапасының төмендеуін көрсетеді. Бұған қоса, ол тұтынушы денсаулығына әлеуетті қауіп төндіруі мүмкін, себебі, бұзылған өндірістік процестер немесе бактериялық ластану өнімнің қауіпсіздігіне кері әсер ететіні рас.
"Каприл қышқылы мөлшерінің жоғарылауының бірнеше себептері болуы мүмкін. Бұл негізінен, өнімді өндіру немесе сақтау кезіндегі бұзушылықтар. Каприл қышқылы сүттегі майлардың ыдырауы нәтижесінде түзіледі. Егер сүт сапасыз болса, дұрыс сақталмаса немесе денсаулығында ақауы бар сиырлардан алынса, бұл май қышқылдарының, соның ішінде каприл қышқылының артық өндірілуіне әкелуі мүмкін. Сондай-ақ, каприл қышқылының жоғары деңгейі қажетсіз бактериялық процестердің нәтижесі болуы мүмкін. Мысалы, пастерлеу жеткіліксіз болса немесе өндіріс кезінде гигиеналық талаптар сақталмаса, каприл қышқылының түзілуін тудыратын бактериялар дамуы мүмкін", – дейді тұтынушылар құқығын қорғау жөніндегі сарапшы Жанна Биятан.
Кефирдегі каприл қышқылының мұндай құрамының тағы бір себебі – ашыту технологиясының бұзылуы, сондай-ақ ұзақ уақыт бойы дұрыс сақталмаған жағдайлар болуы мүмкін. Өндіріс процесінде сәйкес емес ұйытқы пайдаланылса, өнім шектен тыс ашып кетуі мүмкін. Бұл май қышқылының құрамын арттыруы мүмкін. Кефирді тым ұзақ сақтау, әсіресе, рұқсат етілгеннен жоғары температурада ұстау майлардың ыдырауын тездетеді және каприл қышқылының жиналуына әкелетіні анық.
Бірақ каприн қышқылының төмен деңгейі өнімнің май балансындағы теңгерімсіздікті көрсетуі мүмкін, бұл оның сапасы мен тағамдық құндылығына теріс әсер етеді. Бұл сондай-ақ жалған сүт өнімі немесе сұйылтылғаны, оның табиғилығы мен стандарттарға сәйкестігіне күмән тудыратын белгі болуы мүмкін.
Жанна Биятан айран таңдағанда не нәрсеге назар аудару керектігін айтты.
"Бірінші және ең бастысы, жапсырмаларды мұқият оқып шығыңыз. Сүт өнімдерінің, соның ішінде айранның құрамында бөтен ингредиенттердің болмауына назар аударыңыз. Сақтау шарттарын, температуралық жағдайларды, өндіру күнін және жарамдылық мерзімін естен шығармаңыз. Егер сіз дұрыс сақталмаған немесе жарамдылық мерзімі өтіп кеткен өнімді тұтынсаңыз, денсаулығыңызды бұзатыныңыз анық".
Бұл материалды әлеуметтік жобаның орындаушысы – "Маңғыстау облыстық тұтынушылардың құқықтарын қорғау қоғамы" қоғамдық бірлестігі дайындаған. Тауарлардың (жұмыстардың, қызметтердің) сапасын зерттеу нәтижелері туралы "МОТҚҚҚ" ҚБ таратқан ақпарат, сондай-ақ басқа да ақпараттар жарнама болып табылмайды және тұтынушылардың құқықтары мен заңды мүдделерін іске асыруға ықпал етеді.
Осыған ұқсас сұрақтар бойынша 87054222739 байланыс нөміріне немесе Instagram-дағы OZPP.KZ парақшасына хабарласуға болады.
Оқи отырыңыз
