Көлік министрлігі қазақстандықтардың Алматы әуежайының жұмысына наразылығынан кейін мәлімдеме жасады
Сурет: Telegram/kolikpress
Ведомствоның мәліметінше, Qatar Airways әуе компаниясы 3 маусымнан бастап жаңа терминалға көшу туралы электрондық хабарламаларды жолаушыларға мерзімінен бұрын таратқан. Алайда, шетелдік компания жүйелерді интеграциялауға үлгермей, аталған жұмыстар 11 маусымға шегерілді.
"5 маусымда Qatar Airways әуе компаниясы жолаушыларға рейстер 11 маусымнан бастап жаңа терминалдан жүзеге асырылатындығы туралы хабарлама жіберген. Жолаушылардың 98%-ы хабарламамен танысқан...Барлық халықаралық (күніне шамамен 50 рейс) рейсті толық аудару кезең-кезеңімен жүзеге асырылып, 20 маусымда аяқталады деп жоспарлануда",- делінген хабарламада.
Жалпы 1 маусымнан бастап терминал 54 рейске қызмет көрсетті (1 маусым – 9 рейс, 5 маусым – 17 рейс). Жалпы тасмалданған жолаушылар саны – 8504.
"Алматы халықаралық әуежайы жаңа терминал жұмысының басталуына байланысты түсініспеушіліктердің алдын алу бойынша барлық күш-жігерін жұмсайды және жолаушылардан уақытша қолайсыздықтар үшін кешірім сұрайды".КГА баспасөз қызметі
Бұған дейін әлеуметтік желілерде жолаушылар Халықаралық ұшулар әлі де Алматы әуежайының ескі терминалынан жүзеге асырылып жатқанына шағымданған болатын.
Алматы халықаралық әуежайы 5 маусымда 2021 жылдың маусым айынан бастап Алматы әуежайының басшысы болып табылатын Алып Эр Тунга Эрсойдың 16 маусымнан бастап қызметінен кететінін мәлімдеді.
