Таразда пәтер кезегінде тұрған 90 отбасы баспаналы болды
Сурет: zakon.kz
Таразда Мемлекеттік рәміздер күні аясында пәтер кезегінде ұзақ жылдар бойы тұрған 90 адамға «Нұрлы жер» тұрғын үй бағдарламасы бойынша салынған пәтер кілттері табысталды.
Пәтерлер жетім балалар, мүгедектер, толық емес және аз қамтамасыз етілген отбасылар, сонымен қатар әлеуметтік жағынан халықтың осал тобындағы басқа да санаттарға жататын азаматтарға үлестірілді. 5 қабатты екі тұрғын үй Арай-2 шағын ауданында орналасқан.
Жамбыл облысының әкімі Бердібек Сапарбаев тұрғындарды қоныс тойымен құттықтады.
- Біздің елде қол жетімді баспана мәселесін шешуге айрықша көңіл бөлінуде. Өткен жылы «Нұрлы жер» бағдарламасы бойынша 2 мыңнан астам тараздық жаңа қоныс тойын тойласа, биыл облыс орталығын 50-ден астам көп пәтерлі тұрғын үй салу жоспарланған. Мемлекет басшысының тапсырмасымен әзірленген жаңа «5-10-20» бағдарламасы да мыңдаған отбасыларға баспана алуға мүмкіндік бермек. Мемлекеттік рәміздер күнімен қатар келген қоныс тойларыңыз құтты болсын!
Шаңырақтарыңыз шаттыққа толы болып, береке-бірлігіміз арта берсін, - деді облыс әкімі.
Бұл күні қоныс тойын тойлағандардың қатарында Ауған соғысының ардагері Берік Торғайбековтің отбасысы да бар.
- Бізге қамқорлық көрсеткені және қолдау білдіргені үшін мемлекетке көп рахмет. Бүгін біз үшін қуанышты күн. Отбасымызбен ұзақ уақыт бойы пәтер жалдап тұрдық, баспана мәселесін өз бетімізше шешуге мүмкіншілігіміз болмады. Мемлекеттік қолдаудың арқасында бүгін біз екі бөлмелі пәтерге ие болдық, - дейді ол.
Іс-шараның салтанатты рәсімінен кейін кілт иелері пәтерлеріне асыға енді. Олардың жүздерінен баспана бақытын кешкен әсерлі сезімдерін байқамау мүмкін емес еді.
Айта кетейік, ағымдағы жылы Тараз қаласында 54 көп пәтерлі тұрғын үйдің құрылысы жүруде. Осылайша, 3025 отбасын жеке баспанамен қамтамасыз ету жоспарланып отыр. Оның ішінде әлеуметтік аз қамтылған және көп балалы отбасылар санатындағы 1100 отбасы бар.
Бүгінгі таңда Тараз қаласы бойынша 18,6 мың адам тұрғын үй кезегінде тіркелген.
Ал "Жұмыспен қамтудың жол картасы – 2020" бағдарламасы қаладағы тағы бірқатар мәселені шешуде. Қазір тараздағы 163 көпқабатты үйдің алдындағы аулаларды, 96 көше мен 4 көшенің жолдары мен тротуарлары жөндеу жүргізілуде. Жол салу, саябақтарды абаттандыру сияқты жұмыстардың барлығы осы бағдарлама арқылы бөлінген қаражатпен жасалуда. Биыл қаржы көзін тауып, қаладағы мектептердің сыртта орналасқан дәретханаларын ішке орнату жоспарланған.
